मलंगवा, सर्लाही — जनता समाजवादी पार्टी, नेपाल (जसपा नेपाल) का सर्लाही निर्वाचन क्षेत्र नम्बर २ का उम्मेदवार भरत चौधरीले मलंगवा नगरपालिकामा मोटरसाइकल र्यालीसहित व्यापक घरदैलो कार्यक्रम सम्पन्न गर्नुभएको छ। कार्यक्रमका क्रममा उहाँले विभिन्न वडामा पुगेर मतदातासँग प्रत्यक्ष भेटघाट तथा अन्तरक्रिया गर्नुभयो।
मोटरसाइकल र्यालीमा पार्टीका नेता–कार्यकर्ता तथा समर्थकहरूको उल्लेख्य सहभागिता रहेको थियो। घरदैलोका क्रममा स्थानीय बासिन्दाले उम्मेदवार चौधरीप्रति विश्वास व्यक्त गर्दै आगामी निर्वाचनमा जित सुनिश्चित हुने धारणा राखेका छन्।
स्थानीयहरूका अनुसार पछिल्लो समय देशमा देखिएको ‘जेन्जी आन्दोलन’पछि राजनीतिक रूपान्तरणको चाहना तीव्र बनेको छ। परम्परागत शैलीभन्दा फरक, काममुखी र परिणाममुखी नेतृत्वको आवश्यकता महसुस गरिएको भन्दै उनीहरूले चौधरीलाई व्यवहारिक विकल्पका रूपमा लिएको बताएका छन्।
कार्यक्रममा बोल्दै चौधरीले क्षेत्रको शैक्षिक अवस्था सुधार, सडक तथा अन्य भौतिक पूर्वाधार विकासलाई प्राथमिकतामा राख्ने स्पष्ट प्रतिबद्धता जनाउनुभयो। “निर्वाचित भएपछि जनताले प्रत्यक्ष रूपमा विकासको अनुभूति गर्ने गरी काम गर्छु,” उहाँले भन्नुभयो, “म केवल भाषण गर्ने होइन, काम गरेर देखाउने नेता हुँ।”
स्थानीयवासीहरू भन्छन्, वर्तमान राजनीतिक अवस्थाबाट निराश मतदाताहरू अहिले भाषणभन्दा काम गर्ने नेतृत्वको खोजीमा छन्। यही कारण भरत चौधरीप्रति आम नागरिकको आकर्षण र समर्थन बढ्दै गएको उनीहरूको दाबी छ।
