गत आर्थिक वर्षको तुलनामा आयात ३ दशमलब ७९ प्रतिशतले घटेको छ । भन्सार विभागले सार्वजनिक गरेको तथ्याङ्क अनुसार चालु आर्थिक वर्षको कात्तिकसम्म ५ खर्ब १२ अर्ब ५० करोड रुपैयाँको वस्तु तथा सेवा आयात भएको छ । यो आयात गत आर्थिक वर्षको सोही अवधिको तुलनामा ३ दशमलब ७९ प्रतिशतले कम हो । गत वर्ष कतिपय विलासी वस्तुको आयातमा प्रतिबन्ध गरे पनि ४ महिनामा ५ खर्ब ३२ अर्ब ६९ करोडको वस्तु तथा सेवा आयात भएको थियो । विभागका अनुसार कात्तिकमा १ खर्ब ५ अर्ब रुपैयाँ बराबरको सामान आयात भएको छ । असोजमा १ खर्ब ४८ अर्बको आयात भएको थियो । कात्तिकमा जम्मा ५७ अर्ब राजस्व सङ्कलन भएको सरकारी तथ्यांक छ। कात्तिकमा १४ दिन बिदा परेका कारण पनि राजस्व कम सङ्कलन भएको हो । विभागकाअनुसार चालु आर्थिक वर्षको पहिलो चार महिनामा निर्यात पनि खुम्चिएको छ । कात्तिकसम्म जम्मा ५० अर्ब ५६ करोड रुपैयाँको वस्तु निर्यात भएको छ । यो रकम गत आर्थिक वर्षको सोही अवधिको तुलनामा ७ दशमलब ६८ प्रतिशत कम हो । गत आर्थिक ४ महिनामा ५४ अर्ब ७७ करोडको निर्यात भएको थियो । आयात घटेका कारण व्यापार घाटा भने घटेको छ । गत आर्थिक वर्ष साउनदेखि कात्तिकसम्म ४ खर्ब ७७ अर्ब ९१ करोड व्यापार घाटा रहेकामा यसपालि सोही अवधिमा ४ खर्ब ६१ अर्ब ९३ करोड घाटा भएको विभागले जनाएको छ ।
