सर्लाही–१ मा भारी मतान्तरसहित रास्वपाकी नीतिमा कार्की विजयी

सर्लाही। प्रतिनिधि सभा सदस्य निर्वाचन अन्तर्गत सर्लाहीका दुई निर्वाचन क्षेत्रमा राष्ट्रिय स्वतन्त्र पार्टी (रास्वपा) का उम्मेदवारहरूले प्रभावशाली नतिजा हासिल गरेका छन्। सर्लाही क्षेत्र नम्बर १ मा रास्वपाकी उम्मेदवार नीतिमा भण्डारी कार्की भारी मतान्तरसहित निर्वाचित भएकी छन्।
अन्तिम मतपरिणाम अनुसार कार्कीले ४४ हजार १८१ मत प्राप्त गर्दै विजय हासिल गरिन्। उनका निकटतम प्रतिद्वन्द्वी नेपाली कांग्रेसका उम्मेदवार शम्भुलाल श्रेष्ठले ७ हजार ८७१ मत प्राप्त गरेका छन्। कार्कीले श्रेष्ठलाई करिब ३६ हजारभन्दा बढी मतान्तरले पराजित गरेकी हुन्।
निर्वाचन आयोगका अनुसार नेकपा एमालेका उम्मेदवार मनोज कुमार देवकोटाले ६ हजार १०१ मत प्राप्त गरेका छन् भने नेकपाका उम्मेदवार प्रमोद साह ५ हजार ४९४ मतसहित चौथो स्थानमा रहेका छन्।
अघिल्लो प्रतिनिधि सभा निर्वाचन २०७९ मा सर्लाही–१ बाट लोसपाका रामप्रकाश चौधरी २४ हजार ८३८ मतसहित विजयी भएका थिए। तर यसपटक पुनः उम्मेदवार बनेका चौधरी ३ हजार ९९१ मतमै सीमित भएका छन्।
यसैबीच, सर्लाहीका अन्य निर्वाचन क्षेत्रहरूमा पनि मतगणना जारी रहेको छ र प्राप्त प्रारम्भिक परिणामअनुसार राष्ट्रिय स्वतन्त्र पार्टीका उम्मेदवारहरू अग्रस्थानमा देखिएका छन्।