जनकपुरधाम,फागुन ७ गते । तराई–मधेश लोकतान्त्रिक पार्टी (तमलोपा) की केन्द्रीय सदस्य विभा ठाकुरको नेतृत्वमा जनकपुरधामको शहीद गेट देखि बाबा पेट्रोल पम्प सम्म बृहत सरसफाई कार्यक्रमको आयोजना गरी आज ७३औं प्रजातन्त्र दिवस मनाइएको छ ।
तमलोपा नेतृ विभा ठाकुर राष्ट्रीय सरसफाई अभियानी धीरेन्द्र साह,जनकपुर रेलवे ट्राय्क सरसफाई अभियानी रुबी झा,पत्रकार र विद्यार्थीहरुको सहभागितामा जनकपुरधामको शहीद गेट देखि बाबा पेट्रोल पम्पसम्म बृहत सरसफाई अभियान सम्पन्न भएको हो ।
“हामीले नगरे कस्ले गर्ने अहिले नगरे कहिले गर्ने ,हाम्रो सरसफाई अभियान जारी छ,जनकपुरलाई सफा र सुन्दर रख्छौं”को नारा लगाउँदै अभियानीहरु जोश र जाँगरका साथ शहीद गेट सफा गरेका छन्, जनकपुर वार्ड नं आठका विद्यार्थी आदित्य ठाकुरले जानकारी दिएका छन् ।
यसरीनै सरकारी र देशैभरि स्वेच्छिक रुपमा विभिन्न कार्यक्रम आयोजना गरि दिवस मनाइएको हो ।विक्रम संवत् २००७ सालको क्रान्ति सफल भएर १०४ वर्ष लामो निरंकुश राणाशासन अन्त्य भई प्रजातन्त्र स्थापना भएको सम्झनामा हरेक वर्ष फागुन ७ गते प्रजातन्त्र दिवस मनाइन्छ ।
राज्यशक्तिको स्रोत जनता मात्र हुन् र मुलुकको सार्वभौमसत्ता जनतामा निहित हुनुपर्छ भन्ने मान्यतालाई जनताको संघर्ष तथा वीरवीरांगना शहीदको बलिदानबाट स्थापित गरेको हुनाले आजको दिन नेपालको इतिहासमा गौरवपूर्ण र अविस्मरणीय मानिन्छ ।
