सर्लाही, फागुन २३ – जनता समाजवादी पार्टी (जसपा) नेपालका पूर्व सांसद प्रमोद साह नेकपा (माओवादी केन्द्र) मा प्रवेश गरेका छन्।
सर्लाहीको मलंगवामा आयोजित “जनतासँग माओवाद, तराई-मधेस जागरण अभियान” अन्तर्गत आयोजित जनसभामा प्रमोद साहले माओवादी केन्द्रमा प्रवेश गरेका हुन्। माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’ले उनलाई पार्टीमा स्वागत गरेका छन्।
साह २०७४ सालको आम निर्वाचनमा सर्लाही क्षेत्र नम्बर १ बाट प्रतिनिधिसभा सदस्यमा निर्वाचित भएका थिए।
पार्टी प्रवेश गरेपछि नेता साहले संघीय लोकतान्त्रिक गणतन्त्र स्थापनामा माओवादी केन्द्रको ऐतिहासिक भूमिका रहेको उल्लेख गर्दै आफूले यही दल रोजेको स्पष्ट पारे। उनले मधेस आन्दोलनका बाँकी कार्यभार पूरा गर्न माओवादी केन्द्रको नेतृत्व आवश्यक रहेको बताउँदै, उत्पीडित समुदायको मुक्तिको लागि माओवादी नै एक मात्र भरोसाको केन्द्र रहेको जनाए।
साहले काङ्ग्रेस र एमालेलाई पहिचान विरोधी दलको रूपमा चित्रित गर्दै मधेसी दलहरू अवसरवादमा लिप्त भएको आरोप लगाए। उनले मधेसी जनताको हक, पहिचान, अधिकार र सुशासनको सुनिश्चितताका लागि माओवादी केन्द्रको अभियानलाई सशक्त बनाउने प्रतिबद्धता व्यक्त गरे।
यस अवसरमा पूर्व प्रदेश सभा सदस्य निराकुमारी साहसहित विभिन्न दलका नेता, कार्यकर्ता तथा समर्थकहरू ठूलो संख्यामा माओवादी केन्द्रमा प्रवेश गरेका छन्। माओवादी केन्द्रद्वारा सञ्चालित तराई-मधेस जागरण अभियानलाई सशक्त बनाउन यो प्रवेश महत्वपूर्ण मानिएको छ।
