१० फागुन, काठमाडौं | ताप्लेजुङको फुङलिङ बजारमा ‘नो केबुलकार’ समूह र प्रहरीबीच झडप भएको छ। झडपका कारण बजारमा तनावपूर्ण अवस्था सिर्जना भएको छ।
सहायक प्रमुख जिल्ला अधिकारी सन्दीपा खड्काका अनुसार झडपका क्रममा केही प्रहरी घाइते भएका छन्। आन्दोलनकारीहरूले सर्वसाधारणको घरमा आगोका राँको फाल्न थालेपछि अवस्था झन् जटिल बनेको उनले बताइन्।
सहायक प्रमुख जिल्ला अधिकारी खड्काका अनुसार ‘नो केबुलकार’ समूहका समर्थकहरूले पदयात्रा गर्दै बजार झरेका थिए। उनीहरूले शान्तिपूर्ण कोणसभा गर्ने बताएका थिए, तर कोणसभा नगरी राँके जुलुस गरेका थिए। जब प्रदर्शनकारीहरूले सर्वसाधारणको घरमा राँको फाल्न थाले, प्रहरी बल प्रयोग गर्न बाध्य भएको खड्काले जानकारी दिइन्।
झडपका क्रममा ५-६ जना सुरक्षाकर्मी घाइते भएका छन् भने प्रदर्शनकारीहरूको क्षतिको विवरण संकलन भइरहेको छ। प्रहरीले केही प्रदर्शनकारीलाई नियन्त्रणमा लिएको छ।
ताप्लेजुङका प्रमुख जिल्ला अधिकारी नेत्रप्रसाद शर्माका अनुसार प्रदर्शनकारीहरूले वीरेन्द्र चोकमा प्रहरी र स्थानीय नागरिकको घरमा आगो फालेका छन्। प्रहरीले आगो निभाउने प्रयास गर्दा प्रदर्शनकारीहरू आक्रमक बनेका थिए। स्थानीय बासिन्दाले घरमा फालेको आगो निभाउन सफल भएका छन्।
शर्माका अनुसार आगजनीका दोषी केही प्रदर्शनकारीलाई नियन्त्रणमा लिइएको छ। ‘नागरिकको घरमा र प्रहरीमाथि आगो फाल्नेहरू नियन्त्रणमा छन्, तर कति जना छन् भन्ने विस्तृत विवरण आउन बाँकी छ,’ उनले भने।
झडपका कारण फुङलिङ बजारमा त्रासको वातावरण छाएको छ। स्थानीय प्रशासनले अवस्था नियन्त्रणमा लिन सुरक्षा सतर्कता बढाएको छ।
