काठमाडौँ — यस वर्षको प्रणय दिवसको साताभर ३ लाख ४८ हजार स्टिक गुलाब फूल खपत भएको छ । फ्लोरिकल्चर एसोसिएसनका अनुसार प्रणय दिवसको एक सातामा बिक्री भएको गुलाबको मूल्य ३ करोड ४८ लाख रुपैयाँ बराबर हो । एसोसिएसनका अनुसार पोहोरको प्रणय दिवसको तुलनामा यो वर्ष ६८ प्रतिशत धेरै गुलाब खपत भएको छ । पोहोरको प्रणय दिवसमा एक सातामा २ लाख ७ हजार स्टिक गुलाब खपत भएको एसोसिएसनले जानकारी दिएको छ ।
काठमाडौ उपत्यकामा मात्रै ६० प्रतिशत गुलाब खपत भएको एसोसिएसनले जनाएको छ । प्लान्ट क्वोरेन्टिन तथा विषादी व्यवस्थापन केन्द्रले गुलाब फूल आयातमा रोक लगाए पनि बजारमा गुलाबको अभाव नदेखिएको फ्लोरिकल्चर एसोसिएसनका अध्यक्ष मिन बहादुर लामाले बताए ।
केन्द्रले गुलाब फूलको आयातका लागि अनुमति पत्रमा रोक लगाउँदा समेत सहजै गुलाब आयात भइरहेको उनले बताए । सम्बन्धित भन्सार नाकाहरुमा भन्सार तथा प्लान्ट क्वारेन्टाइन कार्यालयबबीच समन्वयको अभाव रहेको समेत पुष्टि भएको उनले बताए ।