धनुषाको इलाका प्रहरी कार्यालय सखुवा महेन्द्रनगरको हिरासत फोडेर भागेका दुई थुनुवा अझै पक्राउ पर्न सकेका छैनन् । पुस १५ गते राति हिरासत फोडेर विभिन्न मुद्दाका ६ जना थुनुवा फरार भएका मध्ये नगरपालिका ६ बस्ने शंकर महतो र मिथिला नगरपालिका २ का रोसन यादव अझै पक्राउ पर्न नसकेका हुन् ।
शंकर हातहतियार मुद्दामा र रोशन यादव शन्तिसुरक्षा विरुद्धको कसुरमा पक्राउ परेर हिरासतमा थिए । अन्य भागेका योजनाकारसहित चारजनालाई प्रहरीले एक साताभित्रै पक्राउ गर्न सफल भएको थियो ।
शंकर र रोशनस हिरासतबाट लागुऔषध कसुरमा पक्राउ परेका क्षिरेश्वरनाथ नगरपालिका ५ का ३९ वर्षीय विनोदकुमार शर्मा, शान्ति सुरक्षाविरुको कसुरमा क्षिरेश्वरनाथ नगरपालिका २ का २५ वर्षीय अमित मण्डल, २५ वर्षीय हरिदीप सिंह, हातहतियार मुद्दाका मिथिला नगरपालिका ६ का २८ वर्षीय रोशन महतो हिरासतबाट फरार भएका थिए ।
घटना पश्चात जिल्ला प्रहरी कार्यालय धनुषा र मधेश प्रदेश प्रहरी कार्यालयले संयुक्त प्रहरी टोली परिचालन गरी व्यापक सर्च अपरेशन चलाएको थियो । खोज तलास गर्ने क्रममा घटनाकै भोलिपल्ट पुस १६ गते रोशन, १७ गते हरिदिप र अमितलाई पक्राउ गरेको थियो भने १८ गते राति विनोदलाई प्रहरीले पक्राउ गरेको थियो ।
फरार दुवै थुनुवा भारत पसेकाले पक्राउ गर्न नसकिएको धनुषा प्रहरीले जनाएको छ ।
