बारा, वैशाख १ — मधेश प्रदेशको बारा जिल्लास्थित पोखरिया नगरपालिकामा भारत सरकारको आर्थिक सहयोगमा विद्यालय तथा पुस्तकालय भवन निर्माणको शिलान्यास गरिएको छ।
भारतीय महावाणिज्य दूतावास वीरगंजका महावाणिज्यदूत देवी सहाय मीनाले पोखरिया नगरपालिका–६ स्थित श्री महोबनी पदम माध्यमिक विद्यालयको भवन निर्माण कार्यको शिलान्यास गरेका हुन्। कार्यक्रममा पोखरिया नगरपालिकाका प्रमुख प्रद्युमन प्रसाद चौहानसहित स्थानीय जनप्रतिनिधि तथा सरोकारवालाहरूको उपस्थिति रहेको थियो।
उक्त विद्यालय तथा पुस्तकालय भवन भारत सरकारको करिब ६५.३ मिलियन नेपाली रुपैयाँ आर्थिक सहयोगमा निर्माण हुन लागेको हो। परियोजनाअन्तर्गत तीन तल्ले शैक्षिक भवन, प्रशासनिक भवन, गेट तथा गार्डहाउस, शौचालय, पर्खाल, सरसफाइ तथा खानेपानी व्यवस्था, विद्युतीकरण लगायतका पूर्वाधार निर्माण गरिनेछ।
त्यसैगरी, भवनमा कक्षा कोठा, पुस्तकालय, कम्प्युटर तथा विज्ञान प्रयोगशाला, क्यान्टिन र भान्छा जस्ता सुविधाहरू पनि समावेश गरिने जनाइएको छ।
यो आयोजना उच्च प्रभाव सामुदायिक विकास परियोजना (HICDP) अन्तर्गत सञ्चालन हुने र पोखरिया नगरपालिकामार्फत कार्यान्वयन गरिनेछ।
कार्यक्रममा पोखरिया नगरपालिकाका प्रमुख, विद्यालय व्यवस्थापन समिति तथा अन्य सरोकारवालाहरूले भारत सरकारले उपलब्ध गराउँदै आएको विकास सहयोगप्रति धन्यवाद व्यक्त गरेका थिए।
नजिकका छिमेकी तथा विकास साझेदारका रूपमा नेपाल र भारतबीच विभिन्न क्षेत्रमा सहकार्य रहँदै आएको उल्लेख गर्दै यस्ता परियोजनाले स्थानीय विकासमा थप टेवा पुग्ने विश्वास व्यक्त गरिएको छ।
