सर्लाहीमा गोल्भेडाको मूल्य बढ्दा किसानलाई राहत

सर्लाहीमा गोलभेँडाको राम्रो मूल्य बढन थालेपछि किसानहरु खुसी भएका छन् । अहिले यहाँका किसानले फलाएको गोलभेँडा प्रतिक्रेट ३५० देखि ४०० रुपियाँसम्ममा बिक्री गरिरहेको बताएका छन् । एक क्रेटमा २५ केजी गोलभेँडा हुन्छ भने थोकमा गोलभेँडा १५ रुपियाँ भन्दा बढी मूल्यमा बेच्न पाउँदा किसानलाई राम्रो आम्दानी हुन थालेको हो । केही साताअघिसम्म भारतीय गोलभेँडा अत्यधिक भित्रिँदा यहाँका किसानले उत्पादन गरेको गोलभेँडा बिक्री गर्नै समस्या परेको थियो । पछिल्ला दिनमा भने भारतीय गोलभेँडा भित्रिनेक्रम कम भएको र यहाँ पनि उत्पादन थोरै हुन थालेपछि मूल्य बढेको हो । किसानले माघ मध्यतिर गोलभेँडा प्रतिक्रेट १५० देखि २०० रुपियाँसम्ममा बेचेका थिए । त्यतिबेला न्यून मूल्यमा गोलभेँडा बिक्री गर्न पनि किसानलाई गाह्रो परेको थियो । अहिले भने किसानले गोलभेँडाको राम्रै मूल्य पाइरहेका छ ।