सर्लाही, मलंगवा – ७५ औं राष्ट्रिय प्रजातन्त्र दिवस २०८१ विविध कार्यक्रमका साथ भव्य रूपमा मनाइएको छ। जिल्ला समन्वय समितिका संयोजक तथा जिल्ला स्तरीय मूल समारोह समितिका संयोजक कौशल किशोर सिंहले प्रजातन्त्र दिवसको अवसरमा बोल्दै नेपालीे जनतामा सार्वभौम सत्ता निहित भएको ऐतिहासिक दिनको रूपमा यस दिनलाई स्मरण गर्नुपर्ने बताए। साथै, केही स्थानमा प्रजातन्त्र दिवसको विरोध भइरहेका समाचारप्रति सचेत रहन आवश्यक रहेको उनले बताए।
उनले लोकतन्त्र प्राप्त भइसकेपछि राज्य सेवामा रहेका सबै राष्ट्रसेवकहरूले जनताको सेवाभावका साथ कार्य गर्नुपर्ने आवश्यकता औंल्याउँदै व्यवस्थागत परिवर्तन भए पनि मानसिकता परिवर्तन हुन बाँकी रहेको धारणा व्यक्त गरे।
सर्लाहीका प्रमुख जिल्ला अधिकारी तुलसी बहादुर श्रेष्ठले पनि दिवसको अवसरमा शुभकामना व्यक्त गर्दै, प्रजातन्त्र दिवस नेपाली जनताले १०४ वर्षीय जहाँनिया शासन अन्त्य गरी प्राप्त गरेको ऐतिहासिक अवसर भएको बताए। उनले यो दिन नेपाली जनताले स्वतन्त्रताको अनुभूति गर्न पाएको दिन भएकाले यसको महत्व अझ बढी रहेको उल्लेख गरे।
राष्ट्रिय प्रजातन्त्र दिवस २०८१ को अवसरमा सर्लाहीको मलंगवामा प्रभातफेरी कार्यक्रम आयोजना गरियो। प्रभातफेरीपछि आयोजित शुभकामना आदान-प्रदान कार्यक्रममा स्थानीय जनप्रतिनिधिहरू, सरकारी कर्मचारी, सुरक्षाकर्मी, विद्यार्थी तथा नागरिक समाजका प्रतिनिधिहरूको उपस्थिति रहेको थियो।
यस अवसरमा जिल्ला अस्पतालका बिरामीहरूलाई फलफूल वितरण, रक्तदान कार्यक्रम, खेलकुद प्रतियोगिता तथा दीप प्रज्वलन जस्ता विविध कार्यक्रम आयोजना गरियो।
कार्यक्रममा नागरिक समाजका अध्यक्ष उग्रकान्त झाले प्रजातन्त्र दिवस केवल औपचारिक रूपमा मात्र नभई यसको मर्म बुझ्दै कार्यान्वयन गर्नुपर्ने आवश्यकता रहेको बताएका छन्। जनताको अधिकारको रक्षा, लोकतान्त्रिक मूल्यहरूको सुदृढीकरण तथा सुशासनको प्रत्याभूति गर्न सबै तहका सरकारी तथा गैरसरकारी निकायहरू लाग्नुपर्नेमा उनीहरूले जोड दिए।
राष्ट्रिय एकता, स्वतन्त्रता र जनताको अधिकारको रक्षा गर्ने संकल्पका साथ ७५ औं प्रजातन्त्र दिवस उल्लासमय रूपमा मनाइएको आयोजकहरूले जानकारी गराएका छन्।
