काठमाडौं । सिद्धार्थ बैंक लिमिटेडले मधेश प्रदेशका विभिन्न स्थानमा वित्तीय साक्षरता कार्यक्रम सम्पन्न गरेको छ। वित्तीय साक्षरताका माध्यमबाट स्थानीय बासिन्दालाई सचेत पार्ने उद्देश्यले बारा र पर्सा जिल्लामा कार्यक्रम सञ्चालन गरिएको हो।
विशेष गरी विप्रेषण प्रापकहरू र सम्भावित वैदेशिक रोजगारीमा जाने व्यक्तिहरूलाई लक्षित गरी आयोजना गरिएको कार्यक्रममा वित्तीय ज्ञान प्रदान गरिएको थियो।
बाराको जीतपुर सिमरा उपमहानगरपालिका–१५ स्थित डुमरवानामा माघ २१ गते तथा पर्साको वीरगञ्ज महानगरपालिका–३१, बेलवास्थित नौकाटोलामा माघ २२ गते कार्यक्रम सम्पन्न भएको थियो। बिफक्याप नेपालको व्यवस्थापनमा सञ्चालन गरिएको कार्यक्रममा डुमरवानामा ५१ जना र नौकाटोलामा ५२ जना गरी कुल १०३ जनाको सहभागिता रहेको थियो।
कार्यक्रममा नेपाल राष्ट्र बैंकका सुमनराज सुवेदीले सहभागीहरूलाई वित्तीय सेवा, डिजिटल कारोबार, विप्रेषण प्रणाली, बचत र लगानीका साथै वित्तीय सुरक्षासम्बन्धी जानकारी दिएका थिए। साथै, दैनिक आम्दानी तथा खर्चको व्यवस्थापन, गुनासो व्यवस्थापन, बैंकिङ सेवा तथा डिजिटल कारोबारका सावधानीहरूबारे समेत सचेतना प्रदान गरिएको थियो।
सिद्धार्थ बैंकले कार्यक्रमले लक्षित वर्गलाई वित्तीय चेतना प्रदान गरी वित्तीय सशक्तीकरणमा महत्वपूर्ण योगदान पुग्ने विश्वास लिएको छ।
