७ बुँदे माग प्रस्तुत
काठमाडौं, साउन १६ –तराई–मधेस क्षेत्रमा व्याप्त खडेरी संकटलाई लिएर नेपाल सरकारले ठोस पहल नगरेको भन्दै मधेस कृषि–जल आन्दोलन सङ्घर्ष समितिले आज काठमाडौंको माइतीघर मण्डलामा विरोध प्रदर्शन गरेको छ।
‘तराई–मधेसको अस्तित्व र अस्मिताका लागि सङ्घर्ष’ भन्ने मूल नाराका साथ आयोजित यस प्रदर्शनमा सहभागीहरूले धानको गाँज, हलो, उखु, जस्ता कृषि सामाग्री प्रदर्शनमा ल्याएका थिए। यी सामग्रीहरू प्रतीकात्मक रूपमा कृषिको संकट र किसानको पीडालाई उजागर गर्न ल्याइएको समितिले जनाएको छ।
सङ्घर्ष समितिले प्रदर्शनसँगै एक विज्ञप्ति जारी गर्दै ७ बुँदे माग पनि सार्वजनिक गरेको छ। ती मागहरूमा तराई–मधेसलाई औपचारिक रूपमा सुखाग्रस्त क्षेत्र घोषणा गर्ने, राहत तथा क्षतिपूर्ति योजना तत्काल कार्यान्वयन गर्ने, किसानलाई मल, बीउ तथा सिंचाइको व्यवस्था सुनिश्चित गर्ने लगायतका विषय समेटिएका छन्।
समितिका अनुसार, खडेरीका कारण सयौं बिघा जमिन बाँझो बस्न पुगेको छ भने लाखौं किसानले जीविकोपार्जनमै संकट बेहोर्नु परेको छ। समितिले यस्तो संकटको घडीमा सरकार चुप लागेर बसेको भन्दै चेतावनीमूलक आन्दोलन सुरु गरिएको बताएको छ।
प्रदर्शनमा सहभागीहरू जनकपुर, सर्लाही, रौतहट, बारा, सप्तरी, पर्सालगायतका जिल्लाबाट आएका थिए। उनीहरूले सरकारलाई समयमै हस्तक्षेप गर्न नसके मधेसमा मानवीय संकट थप गहिरिने चेतावनी दिएका छन्।
सङ्घर्ष समितिले आगामी दिनमा आन्दोलनलाई मधेशभर विस्तार गर्ने तथा आन्दोलनका थप चरणहरू घोषणा गर्ने समेत जनाएको छ।
